{"id":1030,"date":"2011-11-18T18:22:47","date_gmt":"2011-11-18T18:22:47","guid":{"rendered":"http:\/\/vladgonzales.net\/blog\/?p=1030"},"modified":"2011-11-19T14:38:21","modified_gmt":"2011-11-19T14:38:21","slug":"alternate-universes","status":"publish","type":"post","link":"https:\/\/vladgonzales.net\/blog\/2011\/11\/18\/alternate-universes\/","title":{"rendered":"Alternate Universe\/s"},"content":{"rendered":"

Sa isang mundong kawangis ng sa atin, may mga gumaganap sa mga papel na dapat tayo ang umaako.\u00a0 Sa isang kahanay na daigdig, sa kapares na espasyo\u2019t panahon, may humahalili sa ating mga pagkukulang; may ibang timbre sa mga awit na matagal na nating kabisado\u2019t binibirit; ibang pagkain ang hinahagilap ng mga katawang nagugutom, iba ang ugat ng mga gabing mailap ang antok\/ mga umagang maligaya ang gising dahil sagana sa pahingang panatag.\u00a0 Sa isang mundong kawangis ng sa atin, itinutulak at hinihigop ang uniberso ng magkakaibang mga sentro.\u00a0 Umiiral ang mga estrangherong batas ng pag-unawa, maaaring may mga puwersang lampas sa ating nakasanayang parametro ng pisika\u2019t iba pang agham-pangkalikasan.<\/p>\n

 <\/p>\n

Sa isang mundong kawangis natin, maaaring walang lugar para sa pagdadalawang-isip.\u00a0 Walang lugar para sa pagkalugmok sa pagsisisi\u2014dapat bang sinabi ko iyon, tama bang isinakilos ko ang aking naisip, may nagbago ba sa aking mundo kung pinili ko ang ibang direksyon.\u00a0 Baka may isang mundong hindi umiinog sa mga nawala\u2019t hinahagilap na pagkakataon.<\/p>\n

 <\/p>\n

Isang umaga.\u00a0 Isang salamin.\u00a0 Isang mukhang nakatitig, pupungas-pungas.\u00a0 Hinahagilap niya ang sipilyo, tumatakas sa bibig ang amoy ng panis na laway.\u00a0 Tumititig siya.\u00a0 Repleksyon, salamisim.\u00a0 Iniisip niya kung may iba pang nilalang na nakakaintindi ng salitang \u201csalamisim.\u201d\u00a0 Sari-saring halimaw ang iniluluwal ng kanyang minumutang paningin.<\/p>\n

 <\/p>\n