{"id":2634,"date":"2012-12-22T05:01:53","date_gmt":"2012-12-22T05:01:53","guid":{"rendered":"http:\/\/vladgonzales.net\/blog\/?p=2634"},"modified":"2012-12-22T19:44:20","modified_gmt":"2012-12-22T19:44:20","slug":"noong-araw-na-magugunaw-na-ang-mundo","status":"publish","type":"post","link":"https:\/\/vladgonzales.net\/blog\/2012\/12\/22\/noong-araw-na-magugunaw-na-ang-mundo\/","title":{"rendered":"Noong araw na magugunaw na ang mundo"},"content":{"rendered":"

Noong araw na magugunaw na ang mundo, nagpunta ako sa gym.\u00a0 Para kung sakaling nagunaw na nga ang mundo noong araw na iyon, masasabi ng kung sinuman, NASA GYM SIYA NOONG NAGUNAW ANG MUNDO.<\/p>\n

***<\/p>\n

Noong araw na magugunaw na ang mundo, nag-text ako sa mga tao, sabi ko, “O, nasaan na kayo?\u00a0 Paalis na tayo, kayo na lang ang hinihintay.”\u00a0 Nag-text din ako sa isang kaibigan, tinanong ko kung magpapa-breakfast ba siya (kasi nga magugunaw na ang mundo).\u00a0 May agahan naman pero ihahanda pa mayamaya, at matutulog pa siya uli, kahit magugunaw na ang mundo.<\/p>\n

***<\/p>\n

Noong araw na magugunaw na ang mundo, dahil tulog o\/at wala pa ang lahat ng hinahanap, pumunta at nakipaglaro muna ako sa aso ng dating gurong kaibigan na ngayon, doon sa may UP.\u00a0 Mataba ang aso, at makulit.\u00a0 Dinadamba ako pag sinasabi kong papasyal na kami at pupunta sa SM.\u00a0 Pagkatapos kong makikain ng kanin at hotdog sa bahay ng aso, ang aking pre-breakfast breakfast, sa bahay ng dating gurong kaibigan na ngayon, pinuntahan ko na ang mga kaibigang tinanghali ng gising kahit magugunaw na ang mundo.<\/p>\n

***<\/p>\n

Noong araw na magugunaw na ang mundo, kasama ang mga kaibigang sinundo sa kung saan, dumiretso na ako sa kaibigang nagsabing maghahanda siya ng agahan pagkatapos matulog nang pangalawang beses.\u00a0 At ang breakfast na ihinanda niya, parang buong mundo nga ang pakakainin.\u00a0 Kasi nga, magugunaw na.\u00a0 Habang kumakain, nakipaglaro sa isa pang aso, at nakilala ang baby na si Mahimbing.\u00a0 Kung magugunaw na ang mundo, naisip ko, ayos lang din, oks na oks na naman ako.\u00a0 Pero sayang, kasi bata pa si Mahimbing.\u00a0 Kung magugunaw na ang mundo sa sandaling iyon, kawawa naman ang bata, hindi pa niya mararanasan ang mga magandang surpresa ng mundong magugunaw na.<\/p>\n

***<\/p>\n

Noong araw na magugunaw na ang mundo, pagkatapos kumain ng agahang pangsandaigdigan, nagtanungan kami kung saan ba dapat pumunta.\u00a0 Ang sagot namin, “Tagaytay na ‘to!”<\/p>\n

***<\/p>\n

Noong araw na magugunaw na ang mundo, doon sa may Tagaytay, sa may Mahogany Public Market, kumain kami ng mahal na bulalo, ng mahal na pritong bituka, ng mahal na crispy tawilis.\u00a0 Kinuyog kami ng mga agresibong tindero ng kutsilyo\/ special spasol (yun ang kanilang spelling doon)\/ tawilis\/ karne.\u00a0 Bumili na raw kami, malapit na raw kasing maggabi.\u00a0 Kahit makaisang benta man lang.\u00a0 Ang mga tindero sa karinderya, may pagkaagresibo rin.\u00a0 Gaya ng iba pang mga nagtitinda, may sense of entitlement kapag humihirit ng “bakit sa kanya bumili ka?\u00a0 Bakit doon ka kumain e di ba nangako ka na dito kayo kakain sa amin?”\u00a0 Siguro’y tumatapang lang ang lahat pag alam nilang ang mundo nila’y malapit nang mawasak.<\/p>\n

***<\/p>\n

Noong araw na magugunaw na ang mundo, nagpalamig kami sa People’s Park, at pinagtawanan ang taong mag-isang nakaupo sa cable car na sobrang bagal ng pag-usad.\u00a0 Magugunaw na nga ang mundo, hindi pa naghanap ng kasama.\u00a0 O baka wala lang talagang maisama, iyon nga siguro ang problema niya.<\/p>\n

***<\/p>\n

Noong araw na magugunaw na ang mundo, sa huling oras ng pagpatak ng panibagong araw (kahit hindi pa batid kung may kasunod pa), kinanta namin ang lahat ng kantang kasya sa isang oras.\u00a0 Lahat ng mga himutok na doon pa lang sa matrapik na C5 ay isinasabay na sa Air Supply na tumutugtog sa radyo ng auto.<\/p>\n

***<\/p>\n

Noong araw na magugunaw na ang mundo, pag-uwi sa bahay, binuksan ko ang nakuhang regalo–isang t-shirt na may disenyo ng isa sa mga paborito kong superhero.\u00a0 Naaalala ko, sa comics, sinabi niya, na ang tapang at lakas ng loob ay kasama na ng unipormeng suot ng kanyang superhero team.\u00a0 It comes with the uniform.\u00a0 Kumuha ako ng larawan ng sariling suot ang regalong kamiseta, naalala ang mga bagay na nangyari sa araw na magugunaw ang mundo, mula sa oras ng pag-uwi pabalik sa gym (MASABI LANG), doon sa shower room kung saan ang katabing nagbibihis ay hindi nakapagpigil na magsabi sa aking “mahilig ka rin ba sa comics?”\u00a0 Ang suot ko pala kasi noong araw na iyon ay kamisetang may disenyo rin ng cartoon comicbook heroes, at natuwa akong napansin niya iyon.\u00a0 Tulad ng natuwa ako noong nakipagchikahan ako saglit sa kanya tungkol sa Marvel at DC, at noong iniwanan ko siya para maligo nang hindi nagpapakilala kahit magugunaw na ang mundo.\u00a0 Tinitingnan ko ang larawan ng sarili, naisip ang lahat-lahat, at naisip na kung magugunaw man ang mundo, anong oras man dumating ang yugtong ito, gusto kong isiping magugunaw ito nang naipakita kong hindi ako nawala nang hindi man lang nakipaglaban.<\/p>\n